२०८३ श्रावण २२, शुक्रबार १६:१४
नेपाली कांग्रेसका सभापति गगन कुमार थापाले विशेष महाधिवेशन वैधानिक र विधानसम्मत रहेकोले अदालतमा प्रतिरक्षा गरिने बताउनुभएको छ ।
नेपाल लोकतन्त्रवादी आदिवासी जनजाति महासंघको दोस्रो राष्ट्रिय सम्मेलन उद्घाटन गर्दै सभापति थापाले पार्टीको विशेष महाधिवेशनबारे सर्वोच्च अदालतको पछिल्लो आदेशका सम्बन्धमा २४ गते बस्ने केन्द्रीय समितिको बैठकमा छलफल गरी धारणा बनाइने समेत बताउनुभयो ।
विशेष महाधिवेशन वैधानिक र ठीक थियो भनेर पुष्टि गर्नका निम्ति फेरि एकपटक अर्को अवसर प्राप्त गरेको उहाको भनाइ छ । उहाले विधान भन्दा माथि कोही पनि नरहने भएकाले आगामी महाधिवेशन तोकिएकै समय -मङ्शिरसम्म) सम्पन्न गर्नुपर्ने वैधानिक दायित्व र बाध्यता रहेको स्पष्ट पार्नुभयो ।
कार्यकर्ता/शुभेच्छुकहरूले राखेको भरोसालाई टुट्न नदिई पार्टीलाई बलियो बनाउन सवैलाई समेटेर लैजाने उहाले बताउनुभयो । सभापति थापाले सबैलाई सम्हालेर लैजाने कोसिस गर्नुपर्छ भन्नेतर्फ आफु सचेत रहेको बताउनुभयो । साथै उहाले नेपालमा नयाँ सरकार बनेको अवस्थामा प्रतिपक्षका रूपमा खबरदारी गर्ने र संविधानप्रतिको संवेदनशीलता जोगाउने दायित्व रहेको उल्लेख गर्नुभयो ।
संविधान संशोधन गर्दा यसको संवेदनशीलतालाई बुझ्न नसके नेपाल कुनै पनि बेलामा दुर्घटनामा पर्न सक्ने उहाको भनाइ छ । सभापति थापाले संविधान संशोधनमा सरकारको बुझाइले देशलाई ठूलो द्वन्द्वमा धकेल्न सक्ने भएकाले कांग्रेसले निरन्तर दवाव र खवरदारी गर्ने जिकिर गर्नुभयो ।
